Alarma no sector hortícola ante a pasividade da Xunta diante da entrada en vigor da Lei de Seguridade Alimentaria

23-11-2004. O 1 de xaneiro de 2005 vai entrar en vigor a nova Lei de Seguridade Alimentaria, que obrigará á utilización de sistemas de trazabilidade en toda a cadea alimentaria, é dicir, a supervisar os produtos dende a súa orixe ata a cesta da compra. Ademais, no 2006 entrará en vigor o Paquete de Hixiene, que obriga a levar nas empresas alimentarias sistemas de autocontrol baseados nas análises de puntos críticos.

A triste realidade de Galicia é que o 90 % do sector hortícola non está preparado para a aplicación destas normas e, en moitos casos, nin sequera oíu falar do concepto de trazabilidade.

Para o SLG hai un responsábel directo desta situación de incerteza: a Consellería de Política Agroalimentaria. A acusación non é gratuíta, pois o regulamento específica as administracións –no noso caso, a Xunta- teñen a obriga de axudar á implantación dos sistemas de trazabilidade mediante campañas informativas, elaboración de guías de aplicación, e coordinación dos distintos sectores implicados. Tamén será responsabilidade da Xunta, a partir do 1 de xaneiro, a vixilancia do cumprimento desta lexislación.
A pesar destas obrigas, cando estamos a menos de dous meses da entrada en vigor da lei, a Consellería de Política Agroalimentaria non realizou ningunha acción relacionada con este tema para o sector de horta e, o que é máis grave, non está informando e nin sequera sabe cales son as súas competencias no asunto.

Quen si que o teñen claro son as grandes superficies comerciais e os mercados centrais, que van a esixir, de xeito inmediato, o cumprimento da lexislación. Por exemplo, Gadis vén de avisar aos produtores de horta que o abastecen que, dentro de dous meses, deberán ter un número de rexistro sanitario se queren vender no seu centro de distribución.

Isto está a causar moita confusión e alporizamento no sector hortícola, xa que hai moitos produtores que pensan que en dous meses non estarán en condicións de poderlle dar saída ás súas mercadorías. Entre os afectados inclúense moitos labregos que moven un grande volume de ventas con grandes investimentos na produción e no persoal, e que non poden asumir un período sen vender por pequeno que sexa. Se as cousas seguen a facerse así, esta situación pode forzar o abandono dunha porcentaxe importante de produtores.

Dende o SLG imos esixir da Consellería de Política Agroalimentaria unha actitude responsábel ante esta situación para que asuma as súas responsabilidades á hora de realizar ese labor de coordinación entre produtores, distribuidores e consumidores. Para iso debería organizar de xeito inmediato unha xuntanza cos diferentes sectores implicados. Ademais, o Sindicato Labrego tamén pedirá da Consellería que elabore modelos para os agricultores afectados, tanto para os sistemas de trazabilidade como para a aplicación de sistemas de autocontrol baseados nas análises de puntos críticos. Mesmo debería comezarse a pensar na ampliación do prazo para aplicar a Lei de Seguridade Alimentaria, ou en axudar na realización dos trámites e axilizalos para poder adaptar correctamente esta lexislación á realidade da horta galega.