Dende o Sindicato Labrego Galego consideramos as axudas para paliar as perdas provocadas pola seca, que vén de anunciar a Consellaría de Medio Rural, como unha burla para as explotacións agrogandeiras galegas. Financiar os xuros dun préstamo equivalente ás axudas da PAC das explotacións, só facilita que se adianten uns cartos aos que os labregos e labregas tiñan dereito e que, máis tarde ou máis cedo, acabarían ingresando. É dicir, que estas supostas axudas ás explotacións acabarán sendo subvencións a fondo perdido para a banca, que será a que cobre eses xuros custeados con cartos públicos.

Que a Consellaría de Medio Rural pretenda vender esta medida como unha axuda para paliar os danos pola seca roza o ridículo e dá fe da incapacidade da Xunta para facer nada positivo polos sectores agrogandeiros do noso país. De feito, as nosas explotacións gandeiras, por exemplo, están padecendo agora as consecuencias da seca do 2011, pois a falla de choiva do ano pasado impediulles fornecerse de forraxes para este ano. Xa que logo, a Consellaría de Medio Rural tenta facer algo fronte aos danos da seca cun ano de atraso, e faino de xeito moi deficiente: non só non dá axudas -só facilita que se cobren antes os cartos da PAC para que as explotacións gandeiras poidan mercar forraxes- senón que esquece sectores enteiros tamén afectados como o do viño, o da horta ou o da pataca, que o ano pasado xa sufriron perdas millonarias sen que ninguén se acordase deles. O único consolo é que, polo menos, en 2012 a Consellaría de Medio Rural ten constancia de que hai seca e de que esta está a a ter un forte impacto na economía dos diversos sectores agrogandeiros; por desgraza, aínda estamos agardando a que se pronuncie sobre os danos da seca do 2011.

Dende o Sindicato Labrego Galego esiximos que a Consellaría de Medio Rural sente, dunha vez por todas, aos diversos sectores agrogandeiros para analizar as perdas que están sufrindo por mor da seca e articule, en diálogo con eles, medidas e axudas efectivas que axuden a manter as rendas das explotacións nesta conxuntura meteorolóxica excepcional. Tamén pedimos dende o SLG que, sobre todo, a Consellaría de Medio Rural empece a exercer como tal e non se volva esquecer das súas obrigas como fixo o ano pasado.