O informe dado a coñecer pola Comisión Nacional da Competencia sobre o modelo de formación de prezos no sector agroalimentario, e moi especialmente no lácteo, busca únicamente tapar a impotencia política do presidente da Xunta de Galicia que non foi capaz de defender diante do Goberno de Rajoy o que pactou o 7 decembro de 2012 coas organizacións agrarias e a Fenil.

Non se pode entender doutra maneira un texto que ademáis dun exercicio de cinismo insultante, supón a constatación da total sumisión da CNC ao ditado político e partidista do Ministerio de Economía e do Partido Popular. Non existe en toda a argumentación da que fai gala no seu informe a Comisión Nacional da Competencia que se sustente desde un punto de vista legal e imparcial. Proba de que seu interese reside en beneficiar as grandes cadeas de distribución contra dos produtores e consumidores, e que as recomendacións feitas pola Comisión Europea van xustamente na dirección contraria. Nelas recoñecese que a asimetría que caracteriza ao sector agrogandeiro precisa mecanismos de reequilibrio que impida que as multinacionais da distribución destrúan a cadea de valor de produtos como o leite, impoñendo o monopolio dos seus prezos.

O sindicato Unións Agrarias agarda unha toma de posición clara de Núñez Feijoo en defensa do sector lácteo galego que sexa consecuente co relato que lle ven trasladando as organizacións agrarias aquí en Galicia; e que polo tanto, non se agoche tras un ditame da CNC que parece feito como un traxe de xastre para poder esquivar os seus compromisos coa viabilidade das 11.000 explotacións que subsisten en Galicia.

Cabe lembrarlle aos presidente da Xunta de Galicia que o propio Tribunal Galego da Competencia de Galicia, dependente da Consellería de Facenda recoñecía hai unhas semanas: “…o feito de que os gandeiros se vexan obrigados de xeito sistemático a vender leite cru a prezos inferiores aos custes de produción supón un indicio de que poderían estar sendo vítimas dun abuso da súa situación de dependencia económica respecto da industria transformadora e a distribución”. Ademais, e cuns argumentos moi similares os anteriores, a Autoritat Catalana de la Compètencia facía pública a necesidade dunha construción dos prezos da produción agrogandeira. E indo máis alá, o propio goberno italiano está impulsar a concreción de mecanismos de reequilibro.