Unións Agrarias ven denunciando desde hai meses que as sucesivas caídas nos prezos en orixe do leite en Galicia nada teñen que ver coa tendencia que se aprecia nos mercados de referencia internacionais. Así, as dúas últimas subhastas de Fonterra, cuxo índice sirve de referencia mundial tomando como base o leite e derivados que se comercializan desde Australia e Nova Zelanda, experimentou unha alza dun 9% nos dous últimos meses. Do mesmo xeito, o stock de leite operado por intermediarios internacionais, coñecido como Leite Spot dá subas do 10% nas cisternas comercializadas en Italia, Francia ou Holanda.
Desde o sindicato ponse de manifesto que o castigo que están sufrir os gandeiros galegos no pago, débese o interese das industrias en arranxar a súa conta de resultados a costa de desvalorizar a principal zona de produción láctea do Estado. Estas prácticas están acompañadas doutras ilegais e inmorais por parte Río e Lactalis, como a esixencia de avais ou retencións a conta para cubrir unha improbable supertaxa e a pesar de non estar activado desde o FEGA o decreto que lle dea cobertura legal a estas provisións de fondos.
Unións Agrarias ve na falta de iniciativa política do Ministerio de Agricultura o principal escollo para afrontar unha revisión do chamado Paquete Lácteo que poña fin a esta situacións insostible para os produtores galegos diante do fin das cotas. Neste novo horizonte resulta vital para a supervivencia do sector a figura do mediador, como garante dunha comercialización en equilibrio na que elementos como a estabilidade nos volumes de entrega, a garantía de recollida e os contratos de longa duración, sexan unha realidade
Deja un comentario