Socios e traballadores das cooperativas locais participarán activamente na protesta polas rúas de Lalín en defensa do sector leiteiro galego e dos gandeiros, gravemente afectados pola crise láctea.

No transcurso da protesta, Indega, cooperativa local, e unha das dez cooperativas que integran a firma Alimentos Lácteos, constituída por nove cooperativas máis, obsequiará aos manifestantes con 600 litros de leite. Por outra banda, a Agrupación de Cooperativas Lácteas, da que forma parte a cooperativa lalinense de segundo grao Xuncoga, fará o propio regalando 4.500 iogures.

As cooperativas galegas queren ter así un xesto de agradecemento cos cidadáns polo continuo apoio e comprensión amosada cos gandeiros galegos.

Con esta iniciativa demóstrase, ademais, a capacidade e vontade das cooperativas para seguir intercooperarando e levando adiante accións en conxunto pola defensa dun sector tan importante para Galicia e os galegos.