A secretaria xeral do Sindicato Labrego, Carme Freire, reunirase co Ministro de Agricultura este xoves na xuntanza da Interprofesional Láctea (Inlac)

A secretaria xeral do Sindicato Labrego Galego, Carme Freire, ofreceu hoxe, 14 de febreiro, unha rolda de prensa para poñer de manifesto as demandas que diante do ministro de Agricultura, Miguel Arias Cañete, fará o vindeiro xoves, 16 de febreiro, na xuntanza que este manterá coa Interprofesional Láctea (Inlac), e na que Freire, xunto a Charo Arredondo, representará á Coordinadora de Organizacións Agrarias e Gandeiras (COAG).

En concreto, Carme Freire revelou que serán tres as peticións que lle faga ao Ministro de Agricultura:

Que non permita a extorsión que se vai promover dende o Ministerio que dirixe, ao obrigar ás explotacións lácteas a asinar contratos con prezos de miseria (prezos de referencia de mercado) so pena de perder unha parte das axudas da Política Agraria Común (PAC) (BOE do 24 de xaneiro do 2012 -Real Decreto 202/2012, de 23 de xaneiro sobre la aplicación, a partir del 2012, dos pagos directos á agricultura y á gandería). Este Real Decreto pode e debe ser modificado para paralizar a extorsión

Tamén se lle solicitará ao ministro de Agricultura que reforme o “decreto lácteo” publicado en Abril do 2011 polo anterior Goberno e que regula os contratos no sector “porque non inclúe ningún tipo de garantía nin base legal para que as explotacións, a través das OPLs (Organizacións de Productores Lácteos) poidan negociar coas industrias uns prezos que cubran sequera os custes de produción e o traballo”. Os contratos lácteos, tal e como os regulou o anterior Goberno, teñen como referencia de prezo os valores do mercado mundial. Para Carme Freire, “se o Ministerio acepta este tipo de contrato para impoñerlle ao sector, serán os prezos mundiais de miseria -que regulan as multinacionais da distribución- os que se impoñan a través das industrias ás explotacións, significando a ruína de miles de familias, o abandono de máis explotacións; e favorecendo a concentración da produción a nivel industrial, coas consecuencias sociais, medioambientais e económicas que xa están hoxe motivando a desfeita do medio rural en toda a Unión Europea”. Contratos sí pero primeiro garantía de prezo que cubra costes.

O SLG pediralle a Arias Cañete que o Ministerio que dirixe se posicione, clara e publicamente, no debate da reforma láctea que está de plena actualidade a nivel da Unión Europea, en contra da proposta de supresión do control da produción leiteira e apostando pola regulación do mercado. As consecuencias, de ir isto para adiante, sería un exceso de produción en toda a UE que botaría os prezos por terra e deixaría materia prima barata e excendentaria ás industrias e á distribución para inundar os mercados. Isto tería consecuencias dramáticas e suporía o peche de miles de explotacións, tanto na UE polos baixos prezos; como en terceiros países, polas exportacións por baixo dos custes de produción (dumping)