A propia estrutura do rural galego caracterizada por un alto envellecemento, un retorno de emigrantes en idades avanzadas, un territorio disperso e o feito de que cada vez máis mulleres opten por traballar fóra da casa fai aflorar a necesidade de atender axeitadamente a certos colectivos que ata agora eran coidados dun xeito non remunerado.

Esta realidade tradúcese en novas oportunidades de negocio onde as cooperativas agrarias poden destacar como un elemento empresarial interesante, non en van, aséntanse no rural e coñecen de primeira man as necesidades da poboación coa que conviven. Ademais crean emprego de calidade. Segundo o Informe sobre o Estado e a Xestión do Cooperativismo Agrario en Galicia, elaborado cada ano por AGACA, o 83% dos contratos son indefinidos e o 62% das cooperativas ocupa algún dos tres primeiros postos na clasificación de empresas con maior facturación da zona.

Algún dos datos facilitados por Ruth Rodríguez Ferreiros, responsable do Departamento de Estudos de AGACA, durante a Xornada de Difusión de resultados desenvolvida esta mañá en Santiago de Compostela, foron:

• Os indicadores demográficos sitúan unha maior demanda de servizos sociais na parte oriental de Galicia.
• As porcentaxes de paro máis elevadas están na Mariña Occidental, Valdeorras, Allariz-Maceda e A Limia.
• As comarcas con maior número de cooperativas son O Deza, Terra Chá e Ordes.

O próximo paso é presentar o estudo ás cooperativas e promover a consideración do desenvolvemento deste novo servizo, xa sexa a través da incorporación dunha nova sección, ampliando os servizos xa ofertados, mediante colaboración con outras cooperativas ou creando, incluso, unha nova cooperativa.

Marc Riera, técnico da Federación de Cooperativas Agrarias de Cataluña (FCAC), encargouse de presentar os resultados obtidos nesta comunidade autónoma.

Argimiro Levoso, Xerente da Cooperativa Vitivinícola do Ribeiro, puxo de manifesto as experiencias sociais que esta cooperativa está a levar a cabo na actualidade como a colaboración coa Asociación de Familiares de Enfermos de Alzhéimer de Ourense (AFAOR), ofrecendo apoio aos familiares dos enfermos vinculados á cooperativas.

A clausura da Xornada correu a cargo de XoÁn Miguel Concheiro, subdirector xeral de Cooperativas e Economía Social da Consellería de Traballo.

O obxectivo do proxecto Social COOP é vincular a atención das persoas, xerando emprego feminino a través do cooperativismo agrario.