A proposta lanzada pola Ministra de Agricultura, a ourensá Elena Espinosa, de crear a mención “Viñedos de España”, pon en serio perigo as nosas denominacións de orixe, xa que por arte de maxia pretende crearse un paraugas para protexer os viños de mesa que amparará baixo a mesma etiqueta caldos de grande disparidade producidos dende as Canarias ata Cataluña. Este proxecto vulnera a propia esencia dun viño da terra que ampare unha orixe xeográfica e tipicidade localizadas.
Daquela, ¿a quen lle interesa “Viñedos de España”? Para o SLG, tras desta desatinada idea de favorecer a exportación de viños de zonas excedentarias e practicar unha destilación crónica, hai un claro afán de aumentar a presenza de marcas brancas nas grandes superficies comerciais baseándose na idea de crear “viños doados de entender” para os consumidores, xa que resulta difícil vender un viño de mesa branco ou tinto.
Ademais, o feito de permitir engadir a caste e anada de viños de tan distinta procedencia e calidade baixo unha mesma etiqueta botará por terra o traballo de tantos anos das denominacións de orixe galegas e do resto do Estado, que xa non terán razón de ser. De feito, baixo a denominación de “Viñedos de España” poderanse amparar viños coas nosas castes autóctonas Albariño, Mencía, Sousón, Treixadura, Espadeiro, Caiño, etcétera, cun mínimo control de empresas certificadoras, de maneira que calquera operador comercial poderá colocar estes viños no mercado a baixo prezo sen garantir a súa autenticidade nin a calidade no proceso de elaboración. Daquela, ¿que utilidade e función terán, nestas condicións, as actuais denominacións de orixe? ¿Que viños, castes, ou zonas xeográficas protexerán se legalizan esta posibilidade de fraude? Con estas regras do xogo, poderase elaborar Albariño en Albacete, Mencía en Badaxoz, ou Treixadura nas Baleares, e venderse como tales, pero disfrazando a súa auténtica orixe baixo a etiqueta “Viñedos de España”.
Diante de semellante despropósito, o Sindicato Labrego Galego anuncia que se oporá frontalmente a este proxecto, que xa contou coa oposición unánime da Mesa do Viño de Galiza; e denunciará onde faga falla a actitude tan pouco respectuosa da Ministra de Agricultura de cara ás nosas denominacións de orixe; actitude, por outra banda, que só beneficiará a grandes intereses empresariais e globalizadores en detrimento da grande diversidade cultural e xeográfica dos nosos caldos.
Deja un comentario