A conselleira do Medio Rural e do Mar, Rosa Quintana, destacou en Madrid que nestes momentos de crise se conseguira que os fondos para a nova Política Agraria Común para o período 2014-2020 sexan equivalentes aos do período anterior (2007-2013) a nivel estatal. Neste sentido, considerou positivo que se manteñan uns criterios de reparto nos que Galicia mantén o seu peso no conxunto do Estado.
A conselleira fixo estas declaracións no marco da Conferencia sectorial de Agricultura e de Desenvolvemento Rural á que asistiu esta tarde no Ministerio de Agricultura, Alimentación e Medio Ambiente. Ademais lembrou que a nova Política Agraria Común establece unhas liñas de reparto do primeiro piar, é dicir axudas directas ás explotacións, que suporán para Galicia arredor de 160 millóns de euros. En canto ás do segundo piar, é dicir, as axudas destinadas á política de desenvolvemento rural, Rosa Quintana puntualizou que polo momento a cifra non está pechada e que será un aspecto que se debaterá mañá na continuación da Conferencia sectorial. Neste sentido, indicou que espera que Galicia non baixe dos 880 millóns de euros que tivo no período anterior.
Ademais a conselleira destacou que España e Galicia, en particular, “están asumindo unha posición moi valente ao ser a primeira vez na historia en que se vai a definir o que se entende por agricultor activo ligado ás axudas do primeiro piar”. Tamén destacou o seu convencemento de que Galicia acertará á hora de deseñar un novo Plan de Desenvolvemento Rural (PDR) 2014-2020 que impulse a actividade produtiva do rural e se afaste do PDR 2007-2013 «que foi deseñado por un goberno anterior que potenciaba a creación de pistas de pádel e tanatorios e que logo criticaba aos que nos víamos obrigados a levar a cabo ese tipo de infraestruturas sen apenas capacidade de decisión para deseñar novos proxectos».
Xestións
A titular de Medio Rural e Mar lembrou que no momento en que o ministro Arias Cañete chegou ao Ministerio de Agricultura, Alimentación e Medio Ambiente “se lle deu unha volta completa á proposta de reforma da PAC” e isto foi valorado moi positivamente polas organizacións agrarias en Galicia a pesar de que agora estean a criticar o que anteriormente aplaudiron.
Lembrou ademais que no mes de xullo representantes de todas as comunidades autónomas se reuniron co ministro e que nesta xuntanza ase acadaron uns principios para a reforma “cos que estabamos de acordo todas as comunidades autónomas”. Estes principios, sinalou, “recollían en esencia todo o que en Galicia se tiña consensuado coas organizacións agrarias”.
Deja un comentario